Ինչ անել, որ եփելիս միսը պինդ չստացվի

Դիտումներ 2007

Պատրաստի մսի հյութեղությունն ու փափկությունը շատ բանով կախված է նրանից, թե կենդանու մարմնի որ մասից է այն կտրված: Գոյություն ունի կարծիք, որ կենդանու մարմնի հետևի մասից կտրված միսն ավելի նուրբ է ու հարմար է եփելու, տապակելու, գրիլ անելու համար: Իսկ առջևի մասից կտրված միսն ավելի պինդ է և դանդաղ, երկար պատրաստելու կարիք ունի:

Հայտնի է նաև, որ երիտասարդ կենդանիների միսն ավելի արագ է եփվում արդեն ծեր կենդանիների մսից: Խոշոր եղջերավոր անասունի միսն, օրինակ, հորթի մսի համեմատ ավելի շատ դեղին ճարպ է պարունակում, մկանաթելերն էլ ավելի հաստ են: Այն բավականին պինդ է, ուստի շատերը նախընտրում են այս միսը ֆարշի մեջ օգտագործել:

Իսկ ինչ անել, եթե ձեռքի տակ, այսպես ասած, «առաջին երիտասարդության» տավարի միս չկա: Առաջին տարբերակը այն 2-2.5 ժամից ոչ քիչ եփելն է: Եթե ուզում եք խուսափել դրանից, գոյություն ունեն հետևյալ խորամանկությունները.

Ուժեղ կրակի վրա եռացրեք ջուրը, ապա թավայի մեջ գցեք տավարի մսի կտորները, թուլացրեք կրակը, շարունակեք եփել, թույլ մի տվեք, սակայն, որ այն ուժեղ եռա: Միայն թե վտանգ կա, որ այս դեպքում արգանակը այնքան բուրավետ ու համեղ չի ստացվի, քան այն դեպքում, եթե սառը ջրի մեջ միսը դանդաղ եփեիք՝ ընթացքում նրանից փրփուրը հեռացնելով:
Եփելուց առաջ միսը կարելի է մարինացնել: Մսի կտորների վրա փոքր ծակեր արեք, դրեք կտրտված սոխով ամանի մեջ, մի քիչ քացախ ավելացրեք, 1-2 ժամ դրեք սառնարանում, հանեք, լվացեք ու նոր միայն եփեք:
Տավարի միսը փափկացնելու համար մարինադի փոխարեն կարող եք պատրաստի մանանեխ վերցնել, մսի կտորները բոլոր կողմերից մանանեխապատել: Մանանեխը թուլացնում է մսի մանրաթելերի առաձգականությունը: Մոտավորապես կես ժամից միսը լվացեք հոսող ջրի տակ, ապա նոր միայն եփեք:
Եփելուց առաջ կարելի է միսը հատուկ մուրճիկով կամ դանակի հետևի մասով ծեծել: Այդպես այն եփելիս ավելի փափուկ կստացվի:
Եվ վերջապես հիշեք, որ միսը պետք է եփելու վերջում աղ անել, այլապես այն պինդ կստացվի:

Խորհուրդ

Որպեսզի միսը համեղ ստացվի եփելուց մոտավորապես կես ժամ առաջ արգանակի մեջ կարող եք մաղադանոսի կամ նեխուրի արմատ, ամբողջական գազար կամ փոքր գլուխ սոխ, սև կլոր բիբար ու դափնու տերև ավելացնել: