Նոր մանրամասներ Ուշիի ողբերգական վթարից․ զոհերի թիվը հասել է 9-ի
Դիտումներ 766 
Զոհերի թիվը հասել է 9-ի․ նոր մանրամասներ Ուշիի մոտ տեղի ունեցած ողբերգական ավտովթարից
Նոր մանրամասներ են հայտնի դարձել նոյեմբերի 3-ի երեկոյան Արագածոտնի մարզում՝ Ուշիի ոլորաններում տեղի ունեցած խոշոր և ողբերգական ավտովթարից։
Վերջին հրապարակված տեղեկությունների համաձայն՝ ողբերգական վթարի զոհերի թիվը հասել է 9-ի։ Այս մասին հայտնում է NEWS.am-ը՝ հղում անելով ֆոտոլրագրող Գագիկ Շամշյանին։
Հիշեցնենք, որ նոյեմբերի 3-ին՝ ժամը 21։10-ի սահմաններում, Երևան-Վանաձոր ավտոճանապարհի Ուշիի ոլորաններում բախվել էին «Jeep Compass», «Opel Zafira», «Chevrolet Volt» մակնիշների ավտոմեքենաները և կցորդիչով բեռնատարը։
Նախնական տեղեկություններով՝ 8 մարդ մահացել էր հենց դեպքի վայրում, իսկ 3 վիրավոր տարբեր աստիճանի մարմնական վնասվածքներով տեղափոխվել էին «Արմենիա» բժշկական կենտրոն։
ՀՀ առողջապահության նախարարությունը մանրամասներ է հայտնել նաև տուժածների առողջական վիճակի վերաբերյալ։
Նախարարության՝ նոյեմբերի 3-ի երեկոյան հրապարակած տեղեկության համաձայն՝ վիրավորներից մեկի վիճակը գնահատվել է ծայրահեղ ծանր։ Նա գտնվել է վերակենդանացման բաժանմունքում։
Երկրորդ տուժածը ենթարկվել է վիրահատության, իսկ երրորդը անցել է անհրաժեշտ հետազոտություններ։ Վերջինիս առողջական վիճակը գնահատվել է միջին ծանրության։
NEWS.am-ի տեղեկություններով՝ զոհվածների թվում եղել են նաև երիտասարդ ամուսիններ։
Դեպքի վայր են ժամանել փրկարարները, ոստիկանության պարեկային ծառայության աշխատակիցներն ու քննչական խումբը։
Ողբերգական ավտովթարի փաստով նախաձեռնվել է քրեական վարույթ։
Իրավապահները պարզում են պատահարի հանգամանքները, մասնակիցների ինքնությունը և վթարի առաջացման պատճառները։
Նոյեմբերի 4-ի վաղ առավոտյան հրապարակված տեղեկություններով՝ զոհերի թիվը հասել է 9-ի։ Պատահարի պատճառների վերաբերյալ վերջնական եզրակացություն դեռ չի հրապարակվել։
Ամենաընթերցվածը
