Մասնագետները խորհուրդ են տալիս երկու անգամ ավելի շատ բանջարեղեն ու միրգ ուտել

Հիմա շատ զարգացած երկրներում խորհուրդ են տալիս օրը 5 բաժին (400 գրամ) միրգ ու բանջարեղեն ուտել: Հետազոտությունները ցույց են տվել, որ նույնիսկ 200 գրամը , այսինքն՝ խորհուրդ տրված նորմայի կեսը օգտագործելու դեպքում հնարավոր է 16 տոկոսով նվազեցնել սրտի հիվանդությունների, 18 տոկոսով՝ ինսուլտի, 4 տոկոսով՝ քաղցկեղի և 15 տոկոսով վաղաժամ մահացությունների ռիսկը: Իսկ ահա 800 գրամ բանջարեղենն ու միրգը 24 տոկոսով են նվազեցնում սրտի հիվանդությունների, 33 տոկոսով՝ ինսուլտի, 13 տոկոսով քաղցկեղի ու 31 տոկոսով վաղաժամ մահվան հավանականությունը:

Այս բոլոր տվյալները հաշվարկվել են սննդակարգում մրգերի ու բանջարեղենի լիակատար բացակայության հետ համեմատության հիման վրա:

Գիտնականները նաև որոշել են ամենաօգտակար մրգերն ու բանջարեղենները:

Այսպես, սիրտ-անոթային հիվանդություններից ամենալավը պաշտպանում են խնձորը, տանձը, ցիտրուսայինները, կանաչ բանջարեղենը:

Քաղցկեղի առաջացման հավանականությունը նվազեցնում են կանաչ գույնի բանջարեղենը, օրինակ՝ սպանախն ու կանաչ լոբին, դեղին, կարմիր ու նարնջագույն բանջարեղենը, օրինակ՝ բիբարն ու գազարը: