Ձուն եփելու կանոնները

Դիտումներ 1953

Ձուն պետք է սառը ջրով եփել:

Կախված այն բանից, թե ինչպես եք ուզում ձուն եփվի՝ թույլ մնա, «պարկի մեջ» կամ պինդ, դրանք պետք է տարբեր տևականությամբ եփել:

Ֆրանսիացի խոհարար Միշել Ռուն իր «Ձվեր» գրքում ձուն եփելու հետևյալ խորհուրդներն է տալիս. «Որպեսզի ձվերը եփելիս չճաքեն, եփելուց մոտ 2 ժամ առաջ հանեք դրանք սառնարանից ու թողեք հարմարվեն սենյակային ջերմաստիճանին կամ ասեղով ծակեք ձվի բութ ծայրը, որպեսզի անցքից օդ դուրս գա»:

Թույլ եփած ձու: Ձվերի վրա սառը ջուր լցրեք ու դրեք միջին ուժգնության կրակի վրա: Երբ ջուրը սկսի եռալ, հաշվեք 60 վայրկյան (միջին չափի ձվերի համար), այդ ժամանակահատվածում սպիտակուցի վրա թաղանթ կառաջանա: Եթե ուզում եք, որ սպիտակուցն ավելի պինդ ստացվի, իսկ դեղնուցը թույլ մնա, եփեք ևս 30 վայրկյան: Որպեսզի սպիտակուցը պնդանա ևս 30 վայրկյան եփեք: Հանեք դրանք ջրից ու միանգամից դրեք ամանի մեջ:

Ձու «պարկի մեջ»: Եփեք նույն ձևով, ինչպես թույլ ձուն, միայն եռալուց հետո հաշվեք 3 րոպե: Երբ ջուրը եռա, ուժեղացրեք կրակը, ուժեղ եռացող ջրի մեջ ասպիտակուցը ռեզինանման է դառնում: Եփելուց հետո հանեք ձվերը, դրեք սառույցով լցված սառը ջրի մեջ: Ձուն սկսեք մաքրել բութ ծայրից՝ այն պահելով հոսող բարակ ջրի տակ: Ջուրը կթափանցի սպիտակուցի ու բարակ թաղանթի միջև և առանց սպիտակուցը վնասելու մաքրելն ավելի հեշտ կլինի:

Պինդ ձու: Եփեք նույն ձևով ինչ «պարկի մեջ» ձուն, միայն թե եռալուց հետո հաշվեք 6 րոպե:

Խորհուրդներ

Թարմությունը ստուգելու համար ձուն իջեցրեք աղաջրի մեջ: Թարմ ձուն անմիջապես կիջնի հատակը: Եթե ձուն բաժակի մեջտեղի հատվածում մնա, ապա այն այնքան էլ թարմ չէ, օգտագործել կարելի է միայն լավ ջերմամշակման դեպքում: Ջրի մակերեսին մնացած ձուն լավ է նետել աղբը:
Եթե թարմ ձուն ջարդեք ամանի մեջ թափանցիկ սպիտակուցը լավ կպահպանի ձևը, իսկ դեղնուցը ուռուցիկ կլինի: Հին ձվի սպիտակուցը ջրիկ է լինում, իսկ դեղնուցը՝ տափակ:
Որպեսզի ձվերը որքան հնարավոր է երկար թարմ մնան, դրանք պետք է պահել սառնարանում, սուր ծայրերը ներքև: Ձվերը լվանալ պետք է դրանք պատրաստելուց անմիջապես առաջ, և ոչ մի դեպքում սառնարանում դնելուց առաջ: