Հոգեբանը խոսել է Հայաստանում դեպրեսիոն ապրումների, հոգեկան խնդիրների, տագնապային խանգարումների և մի շարք հոգեբանական հիվանդությունների մասին

Աշխարհի բոլոր երկրներում բնակչության մոտ 15 տոկոսի մոտ մտավոր կամ հոգեկան շեղումներ կան: Հայաստանում նման խնդիրներ են գրանցվել բնակչության ընդամենը 1 տոկոսի մոտ: Սակայն դա բոլորովին չի նշանակում, որ այդ խնդիրներն ավելի քիչ տարածում ունեն: Պարզապես մեզ մոտ բավարար վիճակագրական տվյալներ չկան, պնդում է հոգեբան Խաչատուր Գասպարյանը:

Բանն այն է, որ Հայաստանում վիճակագրությունը հաշվի է առնում միայն այն մարդկանց, որոնք բուժվել են կամ բուժվում են հոգեբուժարաններում: Իսկ նրանք, ովքեր բուժվում են մասնավոր բժիշկների մոտ կամ հոգեբանի են այցելում կամ էլ առհասարակ ոչ մի օգնություն չեն ստանում, այդ վիճակագրության մեջ չեն մտնում:

«Կեղծ տպավորություն է ստեղծվում, որ մեզ մոտ հոգեկան խանգարումներով մարդիկ ավելի քիչ են, քան մյուս երկրներում, սակայն իրականում դա այդպես չէ»,- նշեց հոգեբանը:

Նշենք, որ Առողջապահության համաշխարհային կազմակերպության տվյալներով՝ այս կամ այն հոգեկան կամ վարքագծի շեղումներով տառապում է աշխարհում ամեն 4-5-րդ մարդը: Ըստ տարբեր տեղեկությունների՝ բնակչության շրջանում ամենից շատ տարածված հիվանդություններն ու խանգարումներն են.

• Դեպրեսիա (9-20%)
• Կրկնվող դեպրեսիվ խանգարում (5-11%)
• Տագնապային խանգարում (5-10%)
• Ալկոհոլից կախվածություն (7-8%)
• Դիստիմիա (2-6%)
• Խուճապային խանգարում (1.5-4%)
• Սոմատոֆորմ խանգարում(1-4%)
• Ադապտացիոն խանգարում (0.5-2.5%)