Բանջարեղենն ու միրգը թարմ պահելու մի քանի հնարք

Ավոկադոն պահեք թղթե տոպրակի մեջ

Լավ չհասունացած ավոկադոն պահեք սենյակային ջերմաստիճանի պայմաններում՝ թղթի մեջ փաթաթած: Հասունանալուց հետո կարող եք պահել սառնարանում՝ փաթեթի մեջ տեղադրած:

Որոշ միրգ-բանջարեղեններ չի կարելի սառնարանում պահել

Բուլղարական պղպեղը, վարունգն ու լոլիկը պահում են միայն սենյակային ջերմաստիճանում: Սառնարանում պղպեղը կորցնում է իր բույրն ու առաձգականությունը, լոլիկն ու վարունգը լպրծուն զանգվածի են վերածվում:

Սառնարանում չի կարելի պահել նաև չհասունացած միրգ-բանջարեղենը: Սենյակային ջերմաստիճանում հասունանալուց հետո միայն դրանք կարելի է սառնարանում տեղադրել: Հակառակ դեպքում հում մթերքը կբորբոսնի սառնարանում՝ այդպես էլ չհասունանալով:

Բանանի կոթերը փաթաթեք մթերային թաղանթով

Սառնարանում բանանը արագ սևանում է ու կորցնում է համը: Նրան խոնավություն է պետք, իսկ խոնավությունը կապահովեք դրա կոթերը սննդային թաղանթով փաթաթելով:

Մաքրած ու կտրտած բանջարեղենն ու միրգը թարմ պահել կօգնի ջուրը

Մաքրած բողկը, գազարն ու նեխուրը կարող եք պահել ջրով լցված տարայում: Այս նպատակով կարող եք օգտագործել պլաստմասայե կոնտեյներներ կամ սովորական ապակե տարաներ: