Ախտանշաններ, որոնք կարող են պայմանավորված լինել աղիների բորբոքային հիվանդություններով: Գրում է med.tert.am-ը

Մարմնի բարձր ջերմաստիճան ու հոգնածություն

Մարմնի ջերմաստիճանի բարձրացումն առողջական խնդիրների մասին վկայող առաջին ախտանշաններից մեկն է: Եթե բարձր ջերմությունն ուղեկցվում է նաև հոգնածության զգացումով, ապա անհրաժեշտ է խորհրդակցել բժշկի հետ:

Որովանի ցավեր ու սպազմներ

Փորլուծության ու ստամոքսում տեղի ունեցող բորբոքային գործընթացների հետևանքով աղիների հիվանդություններից տառապողների մոտ հաճախ են ի հայտ գալիս որովայնի ցավեր: Որոշ դեպքերում կարող են առաջանալ նաև ստամոքսի սպազմներ, որոնք շատ նման են դաշտանային սպազմներին:

Արյան հետքեր արտաթորանքի մեջ

Առավել ծանր դեպքերում աղիների բորբոքային հիվանդությունների ժամանակ կարող են նկատվել արյան հետքեր արտաթորանքի մեջ: Սպազմներով ուղեկցվելու դեպքում այս ախտանշանը վկայում է մարսողական համակարգի աշխատանքի խանգարման մասին, ուստի այն ոչ մի դեպքում չի կարելի անտեսել:

Ախորժակի կորուստ

Մարսողական համակարգի բորբոքումները հաճախ բացասաբար են ազդում հիվանդի ախորժակի վրա: Բացի այդ, նման դեպքերում սննդի ընդունումից հետո բորբոքային գործընթացներն էլ ավելի են սրվում, ինչը նույնպես հանգեցնում է ախորժակի վատացման:

Քաշի կորուստ

Ախորժակի վատացումն ու օրգանիզմում ընթացող քրոնիկական բորբոքային գործընթացները նպաստում են նաև քաշի անբացատրելի նվազման: Այս ախտանշանը ոչ մի դեպքում չի կարոլի անտեսել, իսկ դրա ի հայտ գալու դեպքում անհրաժեշտ է շտապ խորհրդակցել բժշկի հետ: