ՔՊ-ի քարոզարշավային հանրահավաքը Արմավիրում․ Փաշինյանը խոսել է խաղաղությունից, ընտրություններից և մարզում իրականացված ծրագրերից

Մայիսի 15-ին «Քաղաքացիական պայմանագիր» կուսակցությունը նախընտրական քարոզարշավի շրջանակում հանդիպումներ և հանրահավաքներ է անցկացրել Արմավիրի մարզում։ Քարոզարշավային այցը գլխավորել է կուսակցության վարչության նախագահ, ՀՀ վարչապետ Նիկոլ Փաշինյանը, որը մարզ է մեկնել կուսակցության ներկայացուցիչների և պատգամավորության թեկնածուների հետ։

Փաշինյանը դեռ առավոտյան իր ֆեյսբուքյան էջում տեղեկացրել էր, որ օրվա քարոզարշավը անցկացվելու է Արմավիրի մարզի մի շարք համայնքներում։ Այցի ընթացքում վարչապետը և մարզպետը ներկայացրել են 2018-2026 թվականներին մարզում իրականացված պետական ծրագրերը, այդ թվում՝ ճանապարհաշինության, դպրոցների վերանորոգման, մանկապարտեզների կառուցման, սուբվենցիոն և գյուղատնտեսական ծրագրերի արդյունքները։

Հանդիպումների ընթացքում Նիկոլ Փաշինյանը հիմնական շեշտը դրել է առաջիկա խորհրդարանական ընտրությունների վրա՝ հայտարարելով, որ այս ընտրություններում «ժողովրդի ձայնը չի գողացվելու»։ Նրա խոսքով՝ Հայաստանի քաղաքացին պետք է մասնակցի հունիսի 7-ի ընտրություններին և «տեր կանգնի իր իշխանությանը»։

Փաշինյանը նշել է, որ ՔՊ-ի գլխավոր քաղաքական ուղերձը խաղաղության օրակարգն է։ Նրա խոսքով՝ իշխանությունը ընտրություններին գնում է «Տե՛ր կանգնիր խաղաղությանը» կարգախոսով և համոզված է, որ Հայաստանի անվտանգությունն ու զարգացումը հնարավոր են միայն կայունության և խաղաղության պայմաններում։

Քարոզարշավային այցի ընթացքում ՔՊ ներկայացուցիչները բնակիչների հետ քննարկել են նաև սոցիալական խնդիրներ, համայնքային ենթակառուցվածքների բարելավման ծրագրեր, գյուղատնտեսական աջակցության մեխանիզմներ և աշխատատեղերի ստեղծման հարցեր։ Արմավիրի տարբեր համայնքներում քաղաքացիների մասնակցությամբ անցկացվել են բաց հանդիպումներ և փողոցային շրջայցեր։