Փաշինյանը իր ելույթը սկսեց համերաշխության, սիրո և կրթության թեմաներով՝ շեշտելով, որ պետությունը պետք է ծառայի մարդուն և քաղաքացին զգա պետության աջակցությունը։ Սակայն հանդիպման ընթացքում վարչապետի խոսքը նաև քաղաքական կոշտ երանգ ստացավ։ Նա քննադատեց ընդդիմադիր ուժերին՝ նրանց անվանելով «եռագլուխ հրեշ» և մեղադրելով հասարակության մեջ վախի ու անկայունության մթնոլորտ ձևավորելու մեջ։

ՔՊ առաջնորդը կրկին կենտրոնացավ «խաղաղության օրակարգի» վրա՝ հայտարարելով, որ առաջիկա ընտրությունների հիմնական հարցը խաղաղության և պատերազմի միջև ընտրությունն է։ Փաշինյանի խոսքով՝ իշխանությունը ցանկանում է պահպանել բանակցային ճանապարհը և բացառել նոր պատերազմական ռիսկեր։ Նա նշեց, որ ընդդիմության կողմից առաջարկվող մոտեցումները կարող են երկիրը նոր լարվածությունների առաջ կանգնեցնել։

Ավանցիների հետ հանդիպման ընթացքում վարչապետը նաև անդրադարձավ սոցիալական և տնտեսական խնդիրներին՝ խոսելով կրթության, ենթակառուցվածքների, աշխատատեղերի և համայնքային զարգացման ծրագրերի մասին։ ՔՊ ներկայացուցիչները բնակիչներին բաժանել են քարոզչական նյութեր և ներկայացրել կուսակցության նախընտրական խոստումները։

Քարոզարշավի ընթացքում Փաշինյանը պատասխանել է նաև քաղաքացիների հարցերին և հայտարարել, որ իշխանությունը պատրաստ է լսել հանրության դժգոհություններն ու շարունակել բարեփոխումները։ Նա ընդգծել է, որ իր քաղաքական թիմը ընտրություններին մասնակցում է «կազմակերպված և վստահ» տրամադրությամբ։

Հիշեցնենք, որ «Քաղաքացիական պայմանագիր» կուսակցության նախընտրական քարոզարշավը մեկնարկել էր մայիսի 8-ին Սյունիքի մարզից։ Այդ ընթացքում կուսակցության ներկայացուցիչները եղել են մի շարք մարզերում և վարչական շրջաններում՝ ընտրողներին ներկայացնելով «Տե՛ր կանգնիր խաղաղությանը» կարգախոսով ծրագիրը։